香港至尊萬人迷駿威勝馬克思

猪拉多纳

　　今日7草3泥賽事，草地在C欄上演，賽事模式唔算傾側一邊。至於泥地方面，近期有部分場合一而再有得追，放頭馬威力遠較季初時分大為減低。

　　「電訊超星」1檔令前段留放易做妥，亦應該出彎後取道內欄，對此匹衝力短之馬，有着極大幫助。「駿威煌」排外檔留後，期望再賺快步速，便可保持水準。「駿盈」只要唔係大漏閘，五班中短途長期有得揮。「枕住贏」此程稍勉強，慳得到則有權爭P。

　　「新標誌」今場步速唔會快，2檔守前叠，享受到拖慢形勢，係重磅冇咁安心。「軍士」立心唞夠搏上場，奈何漏閘，不過，休出第二回，偶爾頂得到，勿睇小。「非洲之光」再之前連敗只能講係慢熱，雖然唔知仲識唔識追，期望保持到。「鼓浪春風」和「開心駕到」好位有助，冷配。

　　「香港至尊」係得濕泥那場跟前，近兩仗正常場地，都係靠後追，所以，今仗12檔唔係好大問題，再者，早段唔慌慢，後上跑法隨時受益。

　　「頌友」及「萬人迷」條件各有不足，好在泥地已有證明。「馬克思」帶有蠻勁，若早段扯快，而佢跟得順，末段有資格爆上嚟。「駿威勝」前仗初跑此地走勢不錯，至少隻馬受困前後都識追。「名城」純粹係位靚及磅輕。

　　「喜發龍」及「富吉利」，此程乃最好出路，不過，前駒重磅稍欠冠軍相，後駒則擔心跑法在早段被騷擾。「千杯豪情」跑至第二回已「見影」屬薛廐少數，要跟。「財寶星」跑兩場顯示到冇特別竄勁，前置而跑法靠檻，今次加程和1檔有助。

　　「好心思」搏完再搏，好在有1個月叉電，走樣機會大為降低。「首飾孖寶」部署冇得揀，隔一輪跑一場、事前做妥準備，當然，縮回中程比長途實際。「快利多」連仗短途都近，終於回到此程，係咪完全冇料，睇多場。「光宗耀祖」及「金鎸龍華」，要博忽然交番出能力，論級數則極高，若有賠率，不妨存在幻想空間。

　　「威利猛男」有可能遇番之前同程入Q形勢，何況，肯回到最有根據路程，賽前工夫又入肉，目標清晰。「歡呼星」及「驪龍」，有級數，但都係靠追，視乎早段快或慢。「龍華太旨」特意歇息一段日子，期間投入大量操練，無非為等今仗。

　　「風花雪月」跑至第3仗贏馬，採用留後跑法奏效，而上場衝刺時再冇外閃，又克服到慢步速，好大進步，希望加8磅頂得順。「紅衣巨龍」兩出兩捷實力強，問題係今仗仲有冇早段慢鬥慢處境，如果冇，12檔有危機。「爪皇盛水」出唔出到閘冇保證！但如果冇問題，今仗條件與勝時所差無幾。「大家勝利」重磅係難搞，好在三班此程有底，食老本。「東江神駿」如果臨場情緒夠定，大冷腳可考慮。

　　「超皇鷹」唔係受阻，上場應有三甲，但另一方面，出賽時間表校得好，狀態回起嚟博冧莊。「一言為定」成日追唔切，勝在確認跑得番，出現耐冇見嘅穩定性。

　　「綠色好」剛仗跟得急一樣有P，唔簡單，不過，今仗早段可能仲快，未必夾。「太陽好好」未輸過，季內太銳，轉程也難睇淡。「歡樂時光」此程暫為最強，輕磅跑G唔會太下風。

　　「小宇宙」1檔令跑法唔同大前仗，預期威力將會大增，始終未交代，希望仲頂得住。

　　「名駒」此程唯一出路，本身唔怕外檔及跟得促，12檔依然要揀。「善寳」泥地性能係可以而非出色，作配。「旅英駿駒」少數在泥地跑唔出水準，冷腳。「獵豹小子」外檔焗走前列二叠，對唔鍾意跟馬跑嘅佢，可能係好事。

　　「得男」及「爪皇豪火」，曾在此程埋Q，二班此程能力已獲肯定，只要唔係步速不正常，直路應有份衝。 「事事為王」有質，係嫌賠率過熱。「勁高手」一冇慢步速之助，二班難搵食。「牽動美麗」加磅多，但對手完全唔係近仗般強，若肯採回守三四位跑法，或更有威脅力。