森多利亞順開下盤有計

猪拉多纳

外籍大戶近期手風唔順，剛過去周中又於歐霸盃損手，佢哋力捧德甲球隊史特加最終一敗塗地，經過呢個災難日後，相信需要時間調整同回氣。講番今次重心推介，意甲球隊森多利亞近況弗爆，作客頂得住卡利亞里，受讓平半要下盤！

（周日晚10時開賽）

卡利亞里同森多利亞位列中游，兩支同級球隊碰頭，呢場睇落只係五五波，卡利亞里佔主場之利，正路可稍為秤先。不過，森多今季打起咗個星級小將莫路伊卡迪，情況同熱刺有個加里夫巴利一樣，呢類往往可以喺一啲五五波場合幫球隊贏埋，呢點係今場兩隊最大分野。賭波最好跟紅頂白，呢期森多順開，都係唔好夾硬扒逆水，一於玩下盤啦！
紅軍熱刺做「大」騷

同日英超大戰利物浦主場對熱刺，「紅軍」足足讓到半一，個盤真係有啲離譜，唔少老行家見到都覺得奇怪，完全唔明點解會咁開法！以波論波，熱刺今季表現一定好過利物浦，正路呢場「紅軍」頂多讓平半。不過，莊家今次失驚無神開出呢個盤，明顯係想引人玩下盤，為免墮入陷阱，不如改玩大盤，兩隊都好入得，相信會合演一場入球騷。