車仔衝天摘星

猪拉多纳

及時回勇盡數打底

歐霸盃十六強次回合賽事展開，英超名牌球隊車路士回師主場迎擊羅馬尼亞大軍布加勒斯特星隊，車仔被賓尼迪斯「利物浦化」後，演出飄忽無定，但由於首回合輸緊一粒，今戰唔贏唔掂，贏一粒亦唔穩陣，蘇豪相信車仔打真軍有力大勝，捧「讓球主勝」！

（有線61及201台周五凌晨4時05分直播）

賓尼迪斯素來以戰術大師自居，就咁贏波都唔夠刺激，至鍾意算死草死計爛計，佢哋喺十六強首回合作客星隊死氣沉沉，輸波後全無反擊之力，班波跟手喺足總盃劣勢下逼和曼聯龍精虎猛，短短幾日間完全變身，正正係賓帥帶領「紅軍」時期嘅特點；忽龍忽蟲冇路捉，如今車仔已全面「利化」，大家要慢慢習慣呢種情況。

咁今場又點睇先？車路士淨勝1比0就加時，到時發生乜事冇人知，若然有失波對手就會有個作客入球，到時要入夠三球先可晉級，若想穩陣晉級，最好都係盡數對手奪回主動權。車仔射手丹巴巴亞歐霸盃唔踢得，前線由沉到爆嘅費蘭度托利斯擔正攻堅，好在夏薩特及時回勇，主場對住歐洲三線球隊星隊，發揮正常夠殺o架喇！
星隊作客捱轟

布加勒斯特星隊首回合喺主場爛地發揮較佳，但都係靠個十二碼險勝對手，叻極有限，今次作客實會被圍攻有排頂！車路士上場足總盃作客曼聯尾段如狼似虎狂攻對手，若能發揮相近水準，星隊捱唔到幾耐。車仔級數高，預期今戰可大勝，先揀「讓球主勝」，可兼顧埋大盤。