方嘉柏再爆薄荷糖

猪拉多纳

有啲馬真係生成冷門命，好似方嘉柏馬房嘅「薄荷糖」，前一仗喺谷草一哩爆出50倍大冷W，尋日就轉過嚟跑田草千六米，依然係34倍冷門，結果呢隻馬再次帶來驚喜，殺低客串一天嘅莫雅騎嗰隻「百事神駒」，呢粒「薄荷糖」真係夠晒「冰涼」。
       
薄荷糖後上爆冷W，方嘉柏振臂歡呼。

雖然「薄荷糖」近三場兩度爆冷，但賽後方嘉柏就話自己一啲都唔覺得意外，事關呢組三班賽嘅對手各有疑點，佢認為呢隻馬最多只係廿倍，估唔到最後獨贏有34倍咁好分，所以佢都有叫馬主買番啲。小方仲話依家「薄荷糖」比之前放鬆咗，杜利萊可以沿途做好留放之餘，拉士一樣交到唔錯追勁，日後應該可以再跑長啲都冇問題，部署上更有彈性，前景唔太差。