法國今晚有扒鋸！

猪拉多纳

蠻牛亂闖花都屠房

狂牛難破「法蘭西」魔咒！今晚世界盃外圍賽歐洲區Ｉ組榜首大戰，法國坐鎮主場火併西班牙，「鬥牛國」上仗大意和波兼失去一哥位置，今仗就算有主力大衞施華、佐迪艾巴缺陣下，亦要焗攻爭勝搶首名出線，可惜佢哋於正式比賽作客從未贏過法國，「高盧雞」於浪漫花都布下天羅地網，勢必擒下呢隻「野蠻狂牛」，有得受讓強捧「讓球主勝」。

（now 714周三凌晨4時直播）

先講吓小組形勢，上仗大意畀芬蘭逼和的西班牙，依家以兩分之差屈居法國之後排第二，由於每組首名先可直接出線決賽周，衞冕的西班牙隨時一個唔覺意要淪落到去踢附加賽，因此今仗必須戰勝勁敵法國，才可做番一哥。不過，唔係話你想贏就一定贏到嘅，自從改踢無鋒戰陣後，遇到頑強的鐵桶陣，依然難以破關，特別係「假9」法比加斯狀態反覆，禁區內欠缺一位能一錘定音的射手，令進攻過於迂迴唔夠直接，之前試過作客幾乎畀格魯吉亞守和，結果上周對芬蘭終於出事。
西班牙訪法全敗

然而，據《機密報》爆料，話西班牙領隊迪保斯基無意變陣，寧願讓中鋒韋拿放在左邊，依然用法比加斯出任「假9」，並且將恩尼斯達推前代替停賽的右翼大衞施華，實在頑固，加上碧基上仗同隊友艾比路亞發生爭執，諸事不順喎。睇番資料，儘管近年西班牙都食住法國，但原來法國係「鬥牛士」的凶地，歷來兩次於正式比賽作客都輸波收場，包括91年2月歐國外被對方反勝3比1及84年歐國盃決賽輸0比2，今次來到巴黎絕對唔老利。

另一邊廂，法國領隊迪甘斯為球隊注入永不言敗的精神，呢位球員時代的鐵血防中，非常重視紀律及防守，經過一輪整頓後，內部變得十分團結。法國一向不乏天才，例如列貝利、賓施馬、保羅普巴等，不過迪帥成功將天才同勤奮工兵糅合起來，卡比耶、馬度迪於防線前築起一道堅固的屏障，踢出實效足球。記得去年10月作客西班牙，雖然法國先失一粒，但佢哋冇畀主隊搓到你暈的踢法自亂陣腳，反而勁有耐性等待打反擊機會，最後於補時階段靠基奧特追平。由於法國今仗和波亦可保住優勢，迪甘斯相信會照辦煮碗「解牛」。