獅子留力益貓頭鷹

猪拉多纳

3日後就要去溫布萊踢足總盃4強戰，米禾爾唔勒住就奇！聽日凌晨英冠賽事，米禾爾主場鬥「貓頭鷹」錫周三，以波論波米禾爾實力較佳，但嚟緊足總盃鬥韋根先係重頭戲，為免主力有乜冬瓜豆腐，或出二線兵敷衍，「貓頭鷹」弗爆受讓筍！

（周三凌晨2時45分開賽）
米禾爾足總盃大過天

9年前，「獅子」米禾爾爆大冷殺入足總盃決賽，硬撼曼聯最後輸3粒，但已贏盡掌聲，今屆「獅子」又發威，8強淘汰布力般流浪，即將喺溫布萊球場同韋根爭奪決賽權。對「獅子」嚟講，如果再次殺入決賽除代表無上榮譽外，仲可以得到巨額門票、轉播收入，而且有機會攞到歐霸盃入場券，佢哋又點會錯過搵真銀嘅好機會？球隊目前喺聯賽5分領先降班區域，絕對有失分空間。

相反，「貓頭鷹」只領先降班區域3分，提到護級依然頭痕，好彩中場謝明莊臣狀態大勇，近2戰轟入3球，挾早前作客擊敗李斯特城嘅餘威，今仗受讓值得捧場。