巴塞誘敵吼「半場大」

猪拉多纳

美斯列後備 PSG勢搶胡

歐聯8強次回合，巴塞隆拿主場對巴黎聖日耳門（ＰＳＧ），到底鹿死誰手，美斯能否上陣成為最大關鍵。據悉呢位阿根廷國腳仍未完全傷愈，將先退居後備，聖日耳門必定把握呢段球王出缺「真空期」盡快搶攻，扭轉首回合打和2比2，失兩個作客入球嘅劣勢。不過，巴塞收起美斯亦可能係誘敵之計，令對手放下戒心，再施展突襲，隨時更易入波，上半場或迅速上演入球騷，全力推介2.05倍半場大。

（有線61及201台周四凌晨2時45直播）

美斯首回合半場傷出後，巴塞演出即走樣，畀到聖日耳門教練安察洛堤好大啟示，一旦呢位球王今仗坐後備席，冇咗後顧之憂，就應該全力發動攻勢。以伊巴謙莫域、拿維斯及柏斯托尼等上乘進攻人腳，要攻陷巴塞大門並非難事。尤其係主隊防線傷兵滿營，兩位中堅佩奧爾及馬斯真蘭奴都倦勤，教練維蘭路華被迫用22歲小將馬斯巴查夥拍碧基扼守中路。如果咁都唔先發制人，等同慢性自殺。
法比加斯頂檔火力不減

不過，呢個如意算盤可能只計中一半，事關巴塞最強之處係打整體戰，即使缺少美斯，仍然係一支火力極強嘅勁旅。上仗聯賽代替美斯出任正選嘅法比加斯，就食出「大三元」證明自己完全可以勝任進攻重心，同埋巴塞突然冇美斯，亦可能令聖日耳門感到「迷失」，失去防守重點目標，反而更易失守。
聖日耳門守將表現飄忽

事實上，聖日耳門防線都有隱憂，中堅堤亞高施華有傷在身，頂硬上唔係好事，加上拍檔阿歷士洛里高及門將沙華托尼施利古水準唔穩定，壓得太上進攻，更有利巴塞入波。沒有美斯嘅上半場， 可能先至最多入波、最刺激嘅時候。
出線條件

巴塞隆拿晉級（1.07倍）

‧勝

‧和0比0或1比1

‧和2比2，需要加時

巴黎聖日耳門晉級（6.8倍）

‧勝

‧和3比3，或以更大比數和波

‧和2比2，需要加時

註：（）內為馬會晉級賠率
數讀歐聯

（2）今次係巴黎聖日耳門第2次於歐聯八強戰出現

（4）巴黎聖日耳門作客西班牙戰績為4勝1和3負

（5）巴塞主場對法國球隊的戰績係5勝1和1負

（20）巴塞歐聯主場已保持20場不敗，當中勝出16場

首回合 聖日耳門2:2巴塞隆拿