拜仁入波緊要過贏波

猪拉多纳

今晚兩場歐聯8強次回合都唔係投X嘅好對象，無可否認拜仁慕尼黑近期氣勢好勁，亦剛捧完聯賽冠軍，可專心踢歐聯。不過佢哋首回合贏2比0，晉級機會高唱入雲，今仗可贏、可和、可輸情況下，變數太多。另一場巴塞隆拿同樣唔一定要贏，都能夠晉級，忍手齋睇波好過。

拜仁係一支擅攻不擅守球隊，Peter認為教練軒歷基斯會沿用一貫主攻踢法，若然一旦先入波，屆時祖雲達斯就要入四球，先至能夠晉級，機會非常渺茫，唔可以低估客軍搶攻意欲。反觀意大利球隊作風保守，祖記比賽初段未必太冒進，以免重蹈首回合太早失波嘅覆轍，因此預料場面上，拜仁仍會佔優。

不過，就算拜仁先開紀錄，亦唔一定可以帶到尾，事關如果總比數領先到3比0，隨時會因而鬆懈，最終被逼和亦唔奇。再者祖記首回合發揮喺水準之下，而遭到低估，其實今仗並非冇得打，受讓平半有着數，如果忍唔到手，可小注祖雲達斯下盤。

至於巴塞有兩粒作客入球在手，今場打和0比0、1比1都可以晉級，主W太熱唔值博，讓球主勝風險高，呢場齋睇算數。
金句：拜仁要的係第一個入球