巴塞鬥PSG做「大」騷

猪拉多纳

美斯冒險候命搏殺

歐聯8強次回合「雙巴大戰」今晚魯營上演，「地上最強」巴塞隆拿首回合作客法國攞到2:2嘅戰績，表面睇係唔錯嘅戰果，可惜美斯勇戰受傷，令人擔心巴塞會唔會功虧一簣。好彩，小弟聽聞美斯有機會喺呢場生死戰復出，就算打唔足全場，只要後備落場都有力主宰戰局。「球王」打唔打救到傷兵滿營嘅巴塞就未知，但肯定會同巴黎聖日耳門王牌伊巴謙莫域大鬥射術，1.45倍入球大無走雞！

（有線61、64、201及203、中央5台周四凌晨2:45直播）
接受超聲波檢查 連操兩課

美斯自從首回合拉傷大腿後，近期一直有消息話佢加緊療傷，西班牙《體育報》尋日話佢接受過超聲波檢查後，已經連操咗兩課，雖然紮住復出有50%機會再整傷，但以佢向來「鐵人」嘅作風，小弟都相信佢會冒險復出並唔係煙幕。講真只要美斯落到場，無論有冇受傷患困擾，聖日耳門點都要搵2、3個人專人服侍佢，何況美斯向來踢波係食腦多過硬碰，所以只要得巴塞軍醫同意，相信佢在陣就絕對可以化腐朽為神奇，攻破聖日耳門大門唔係難題。
巴塞鬧中堅荒點頂伊巴謙

不過巴塞教練維蘭路華仲有唔少問題要處理，包括馬斯真蘭奴喺首回合受傷肯定唔出得，加上佩奧爾又養緊傷，中路搵邊個同碧基拍檔，真係好難揀。喀麥隆防中桑治今季極少上陣，客串過幾次中堅都係錯漏百出，今場有可能要將左閘艾迪安奴擺入中間頂住先，但要佢面對世界頂級中鋒伊巴謙真係好牙煙啦，巴塞條防線想唔失波都好難！

PSG喺主場失咗兩粒，除非今場有驚人嘅大比數和波出現，如果唔係就一定要贏波先有得出線，呢場作客都唔可以玩死守，中堅堤亞高施華雖然出現喺大軍名單，但都係帶傷在身頂硬上。事實上，佢哋有伊巴謙、拿維斯、柏斯托尼同盧卡斯洛迪古斯幾支大炮，又有碧咸喺中場校炮，玩進攻至係強項。無論最後點，今場一於同巴塞鬥攻，整場入波盛宴報答番捱眼瞓捧場嘅球迷啦！
PSG少食白果

‧巴塞連續6場不敗。

‧巴塞近4場主場賽事只失1球。

&#8231SG連續6場有波入。

&#8231SG今屆歐聯僅輸1場。
玩埋1.73倍「讓主」

巴塞上次對AC都可以頂住落後0:2嘅壓力，喺主場反勝4球出線，今場揸住2個作客入球，相信佢哋踢起嚟更加信心爆棚。相反，PSG想晉級就要爭取入波，以佢哋連續4場歐聯都有失波嘅防線，睇怕幾難擋得住巴塞攻勢，1.73倍「讓主」抵玩。
頂占筍盤：巴塞隆拿（入球大）

首回合：巴塞客和2:2