弗賴堡主場攞威

猪拉多纳

近況回勇放低恐歐症

今晚德甲獨腳戲弗賴堡主場鬥漢諾威，主隊教頭施特拉希近期終放下「恐歐症」心障，球隊狀態亦重返高峰，主場面對態沉作客差兼有內訌之憂嘅漢諾威贏面甚高，弗賴堡讓半一，黑柴撐上盤。

（有線64及203台周六凌晨2時30分直播）

弗賴堡喺實幹型教頭施特拉希帶領下，近兩季攞到超乎理想成績，但上月當有記者問及對衝擊下屆歐洲賽事參賽資格時，佢就搖晒頭話唔想踢歐洲賽，皆因球會財力同人腳兵源都有限，兼顧兩線作戰盞兩頭唔到岸。講完呢番話之後，班球員就立即「聽話」，球隊陷入4輪不勝嘅低潮，由原來第5位倒退到第9位，施特拉希開始明白自己講錯嘢，鼓勵球員重新振作，佢哋最近兩場終於回復佳態，接連擊敗慕遜加柏同漢堡，上輪作客漢堡除咗佔盡優勢外，莊拿芬舒密特嘅入球組織更加靚到絕，現時聯賽排名又回升到第5位，今晚主場遇「作客蟲」漢諾威有力取得3連勝。
漢諾威內訌士氣差

漢諾威近5場聯賽只贏過奧格斯堡，但全場畀人撳住打，人哋中楣中柱之外，佢哋仲三度救出空門，上仗返主場面對史特加，球隊喺傷疲盡起兼主場強項出擊下，演出依然一蹋糊塗，全場捱打下守和0比0，都要多得對手岡崎慎司屢失良機，近日又傳出教練史隆卡同體育總監舒馬迪基不和，士氣受挫。漢諾威近9場作客輸咗7場，今晚遇上回勇嘅弗賴堡睇低一線。