猛將復出阿仙奴炒起諾域治

猪拉多纳

英超Top4爭奪戰進行關鍵時刻，阿仙奴兩大本土猛將禾確特同韋舒亞及時傷愈，今輪強勢回歸喺主場撲擊下游球隊諾域治，「兵工廠」贏波即可重奪主動權，教頭雲格講明要速戰速決盡快解決對手，一眾「廠將」收到柯打會做嘢，大勝可期，熱捧「讓球主勝」！

（有線200及300台周六晚10時直播）
爭前四關鍵時刻

曼市雙雄現時穩佔英超頭兩位，餘下兩個歐聯席位成為倫敦三雄車路士、熱刺同阿仙奴之爭，阿仙奴打少場落後第四位熱刺兩分，熱刺要等到廿一號先喺主場硬撼曼城，「兵工廠」今晚先鬥諾域治，嚟緊周中留守酋長球場決戰愛華頓，若然兩場贏晒就可將壓力推晒畀熱刺，呢個係大逆轉嘅最佳時機，如果再有差池，雲格真係唔知點面對班忠心耿耿嘅「廠粉」。

雲格都知今場波非常重要，賽前叫球員一改慢熱作風，要盡早喺初段射死對手。大軍喺關鍵時刻傳來好消息，主力射手禾確特同中場發電機韋舒亞雙雙傷愈復操，今戰都可候命，有咗兩個猛將回歸，成班波即時「升呢」。查實最近成班「廠將」都好生性，連沉到爆嘅箭頭謝雲奴同進攻中場路斯基都先後爆發，後者今戰有傷未必踢得，但對住弱旅「金絲雀」已經夠殺o架喇。
客軍遇強任人魚肉

諾域治自上年十二月尾至今聯賽十五戰只贏一場，踏入2013年聯賽作客六戰兩和四負，去到晏菲路鬥利物浦任人魚肉淨吞五蛋，喺奧脫福對一哥曼聯畀香川真司轟入三粒大敗○比四，遇強必死，最慘係佢哋近五次作客加埋入得一粒，大舊中鋒格蘭荷特離開自己個竇冇晒料到，鋒力疲弱，無力反抗，今次撞著四連勝每場最少入兩粒嘅「兵工廠」，梗係玩「讓球主勝」啦！