韋根溫布萊搵米

猪拉多纳

差一步入決賽點都搏埋佢

雖然口口聲聲話護級成功先係王道，但離決賽只係一場之隔，點會唔搏埋佢先？英格蘭足總盃4強，韋根於中立場溫布萊球場鬥英冠仔米禾爾，韋根老細韋倫話對進軍歐洲賽視如浮雲，但打入決賽都搵到真銀；加上對手米禾爾實力弱雞，韋根唔專登勒住冇不勝之理，夫添出擊贏得，拿仁捧韋根1.65倍客勝！

（now 633及660周日晚凌晨零時15分直播）
馬天尼斯計掂數發力

本季初利物浦搵新帥，其中韋根領隊馬天尼斯成為熱門，唔少紅軍球迷都對佢好反感，質疑呢位少帥冇功績，又點教大會？教唔教到大會唔敢講，但馬天尼斯教韋根就好掂當，呢個西班牙主帥好識計數，每每帶領球隊到季尾先發力，近期狀態大勇，拿仁非常睇好佢哋能成功護級。

韋根老細韋倫成日話盃賽唔重要，但韋根上圈作客對愛華頓，咪一樣上半場整夠三粒，最後輕取3比0，贏得清脆俐落。韋根幾名攻擊球員如干尼、馬隆尼、包爾斯亞等，近期個個生龍活虎踢到曉飛，將地面小組足球演繹得極佳，溫布萊球場面積較大，米禾爾要守住韋根好難。
米禾爾一味靠頂

米禾爾目前排英冠第16位，計實力起碼曳韋根一班。「獅子」實力非常平庸，今次殺入四強多得抽到靚籤，除淘汰阿士東維拉含金量較高外，其他對手如普雷斯頓、盧頓同布力般流浪都唔難對付。米禾爾係典型英式弱旅，球員落到場係好搏命，但技術極差，獨沽一味硬橋硬馬頂住對手。不過韋根擅打地面戰，今場搓都搓死對手，相信韋根可輕鬆贏波入決賽。