愛華頓有大志咪當流

猪拉多纳

英超進入最後六周，榜尾唔少球隊都要爭取時間同機會搶分護級，其中昆士柏流浪（QPR）今晚將會作客愛華頓。由於排前列嘅「拖肥糖」依家爭緊歐洲賽席位，鬥志唔使懷疑，加上雙方實力同近況都有一定差距，恐怕QPR今場都係凶多吉少，一於熱捧主勝同埋入球大喇！

（有線303及203台周六晚10時直播）

愛華頓上周好唔好彩畀一樣爭緊前四嘅熱刺逼和唔見咗兩分，暫時三十一戰得五十二分排第六，落後第四嘅熱刺六分但少踢一場。「拖肥糖」若想爭歐聯附加賽參賽資格，之後賽事就不容再失。

愛華頓今晚有兩大中場主力派拿同費蘭尼停賽期滿復出，令球隊攻力大增；其他中前場主力好似米拿拉斯、奧士文等狀態大勇，前面無論派安尼捷比定謝拉域都有一定入球保證。愛華頓今季喺葛迪遜公園球場嘅成績唔差，錄得九勝六和一負，面對下游球隊好似新特蘭、韋根同雷丁等更加係全勝添！
QPR有改善冇運氣

QPR上仗主場對護級競爭對手韋根，雖然大部分時間踢少個，但雷米喺85分鐘射入世界波曾經為球隊帶來希望。可惜，QPR只係開心咗幾分鐘，到補時最後一刻畀對手馬隆尼射入自由球，咁就冇咗兩分。

依家QPR同排喺第十七位安全線上嘅新特蘭有七分差距，球隊其實自夏利列納上任後，表現已有改善，佢哋棄用朴智星、格尼路等大牌球星，重用季中加盟嘅贊拿斯、安祖斯唐辛同雷米等實而不華嘅球員，可惜依家先發力似乎太遲，要成功護級睇嚟仲需要一啲運氣。
Wendy推介：愛華頓勝、入球大