史浩克傷鋒難讓利華

猪拉多纳

德甲尾場史浩克04主場對利華古遜，係聯賽榜3哥之爭，史浩克鋒線人腳唔齊，目前落後利華4分又要焗攻，啱晒利華踢反擊，史浩克讓平半，Alwin吼下盤。

（有線61及64台周日凌晨零時30分直播）
亨特拉爾法芬缺陣

史浩克近6輪聯賽贏咗5場，睇落好似好醒，但近兩場贏嘅賀芬咸同雲達不來梅固然弱，佢哋嘅入球大多數都靠對手犯錯所得，尤其上仗兩球都係不來梅中堅穆隆高迪送禮，佢哋本身已經有首席射手亨特拉爾養傷，今場仲有另一進攻重心法芬加入傷兵行列，前線倚賴嘅迪姆普基同馬利卡級數相差太遠，面對強隊好易現形，何況史浩克主場最怕嘅德甲球隊就係利華，歷史上主場對咁多球隊，攞分最少就係對利華，平均每場只得1.25分，近7次主場對利華只曾1勝，讓波靠唔住。

利華近況平均，前仗作客打快速反擊輕取杜塞爾多夫，上仗面對禾夫斯堡嘅穩守攻極都入唔到第2球，最終被逼和1:1，不過幾名鋒將狀態都返咗嚟，計級數不在史浩克之下，今場作客有力搶分。
Alwin推介：

利華古遜下盤 ★★★★

多蒙特讓球勝 ★★★★

禾夫斯堡大 ★★★