阿仙奴雙箭射爆諾域治

猪拉多纳

地頭出擊例炒弱旅

英超歐聯席位爭奪戰入直路，今晚主場出擊嘅阿仙奴狀態大勇，對於每季都係以「爭前四」為目標嘅「小兵」嚟講，要炒諾域治應該唔難，1.58倍「讓球主勝」趁熱食！

（有線200及300、廣東體育周六晚10:00直播）
季尾大爆發 9戰贏7場

當大家以為「兵工廠」今季連前四呢個目標都達唔到嘅時候，佢哋嚟到季尾就突然大爆發，睇吓佢哋近9場英超贏足7場嘅戰績，就知呢班波有幾弗啦！再講，數番佢哋近4場贏唔到嘅聯賽，對手分別係對熱刺、利物浦、車路士同曼城呢4支勁旅，而且佢哋面對實力較弱嘅波好少「甩轆」，有幾仗仲狂炒對手添，例如4:1搞掂雷丁、5:1贏韋斯咸、7:3射爆紐卡素等等，今晚面對近12戰僅得1勝嘅諾域治，入少粒都唔制啦！

仲有呀，一直畀「廠迷」嫌棄嘅科特迪瓦射手謝雲奴，近3場聯賽都好難得咁入咗兩粒，其中一球仲要係半單刀添，似乎有「重生」嘅迹象喎，唔怪得一向低調嘅領隊雲格都忍唔住讚佢啦：「佢把握力的確唔好，但佢只要放鬆啲嘅話，就會有好表現。」家陣謝雲奴信心返晒嚟，拍住狀態唔錯嘅基奧特搵食，夠晒火力射瓜近5仗失10球嘅「金絲雀」！