幸運勇士檔靚

猪拉多纳

　　城市馬場舉行跑日馬，區內交通負荷大，不宜安排太多，此類日賽，每季一兩次，藉以緬懷昔日情懷已足夠。想當年，跑馬玩意紅極一時，人人爭崩頭入場，為求一個馬牌，真係搵到天腳底都要搵。相對依家，場內只係偶爾旺場，真係分別大。

　　第二場五班1650米。「幸運勇士」唔明點解今季表現長期水準以下，跑8場獲1Q，衰喺邊？唔似係健康出現問題，差不多個個月跑1場，冇理由係隻腳唔掂。如果話評分嫌高，目前已經係新低，所以，真係唔知賴咩好？！由於今場潘頓選騎，情況可能有別，因為今季佢只係騎過1次，正正係入Q一役，咁翹又係谷草一哩排內檔，一於信佢眼光。

　　第五場四班1800米。「財源來」今季已經跑咗幾場二二三三，係未贏啫，賽績唔算太差。時近季尾，要諗計交代，唔再跑一哩係好事，因為已經一再追人唔到，而長途唔係唔識跑，馬偉昌硬功又夾，轉一轉可能係好事。只要今場早段唔係太慢，畀佢有充分發揮，交得出力迫「喜欣賞」、「精密紡」水準，贏面幾大。

　　第八場三班1800米。「幸運勝利」現年3歲，手上已有兩W，呢匹馬下季全熟之日，至少二班有得贏，目前可能未有咁本事，不過，三班冇問題。其實，上場難度唔細，初上1800米．又首次跑谷草，依然贏得易，真係極為罕見，呢匹新勝馬追得過。