愛華頓下盤嗒糖

猪拉多纳

費蘭尼轟炸玩謝兵工廠

阿仙奴上周驚濤駭浪三比一反勝諾域治霸住三哥位置，今次留守主場決戰愛華頓，目標仍然係全取三分。「兵工廠」爭奪歐聯席位決心確係好大，但佢哋上場好運多過好波，遇上超級硬淨嘅「拖肥糖」隨時骾親，讓半一嫌多，蘇豪呢場博下盤！

（有線300及200台周三凌晨2時45分直播）

阿仙奴上場對住「金絲雀」諗住依絲Ｗ，點知久攻不下仲要先失一球，如非球證尾段判個爭議性十二碼幫手，睇怕都好難上演呢場超級大逆轉好戲。「兵工廠」喺聯賽連贏四場，但所挫對手最勁嗰隊只係中游分子西布朗，對住諾域治都踢到咁狼狽，贏來冇乜說服力，今次對手係作客實力分子，對住熱刺同曼城都唔使輸嘅愛華頓，睇唔出阿仙奴有乜把握贏到。

隨住禾確特傷愈復出，阿仙奴右邊進攻力度確係強咗，中場有番韋舒亞連繫攻守組織力亦有改善，不過佢哋今場最大隱憂喺防線中路，中堅梅迪薩卡要坐波監，華美倫未復佳態，哥斯尼從來都唔穩陣，好難頂得住喺英超頂上功夫數一數二嘅「爆炸頭」費蘭尼，佢側邊仲有隻老鼠仔安尼捷比，都唔知嘜得邊個好！
「拖肥糖」搶分爭踢歐洲賽

愛華頓同市球會利物浦主帥羅渣士日前高調表示唔介意冇得踢歐洲賽，「拖肥糖」呢邊態度正面好多，守將迪斯甸同箭頭米拿拉斯先後表明會力爭歐洲賽席位，佢哋只係落後阿仙奴四分，連歐聯席位都有得爭，今戰必定寸步不讓。愛華頓對上四場聯賽三勝一和，贏波三戰同樣保持不失，包括喺主場砌低勁旅曼城，班波有質有態，唔赦阿仙奴！