弗賴堡穩守突擊特醒

猪拉多纳

今晚上演另一場德國盃4強，史特加主場對弗賴堡，史軍今季跌晒Watt之餘，仲要主場成績遠差過作客，今仗所謂嘅地利因素根本係陷阱。弗賴堡演出四平八穩，尤其係防守堅固，正係踢盃賽爭取佳績最重要條件，相信佢哋可於法定時間90分鐘坐和望贏，弗賴堡受讓平半，全力推介下盤。

（無綫翡翠台周四凌晨2時30分直播）

弗賴堡能夠位居聯賽前五，好大程度上因為採取穩健踢法，失球數字只係多過拜仁慕尼黑，絕對唔嘢小。踢淘汰賽防守就更加重要，事關一旦先失波，隨時冇仇報。預料弗賴堡作客之下，更傾向沿用最擅長嘅穩守突擊，起碼可以同史特加拉成均勢，受讓相當着數。事實上，好似弗賴堡呢類細球會難得有機會咁威水，幾大都要好好把握，既然已進身德國盃4強，必然賈其餘勇，爭取殺入決賽，鬥心肯定高。
史特加主場欠威力

史特加今季聯賽長期喺德甲下游浮沉，最大死因係主場表現太差，只取得15分，反而作客有21分，近四次主場出擊更輸咗三次，證明佢哋「主場不利」，兼且整體成績唔及弗賴堡下，仲要讓波，似乎受名氣及「假地利」因素影響被高估。史軍今仗遇上三連勝強勢嘅弗賴堡，難望攻入對手之餘，隨時被反咬一口。