伊維恩搶攻輸得仲甘 PSG好「勝」爭雙冠王

猪拉多纳

巴黎聖日耳門雖然喺歐聯8強畀巴塞淘汰出局，不過兩戰「地上最強」唔輸已經贏盡掌聲，亦證明球隊「升呢」成歐洲一線勁旅。依家佢哋已經手執半個聯賽獎盃，下一步梗係要爭做雙冠王啦，一於撐PSG喺法國足總盃8強作客伊維恩大勝一場立威，2.33倍「讓客」好分。

（開賽時間︰周四凌晨2:55）
連續兩次大炒對手

伊維恩上場贏咗雷恩後升上16位，暫時逃離降班漩渦，或者因為咁搞到成班球員個心雄晒，球隊上下都話有能力踢走PSG去爭冠軍喎。有志氣係好，不過做人都要有自知之明先得，兩軍實力相差咁大，伊維恩夠膽主攻相信只會輸得更快。而且佢哋今仗有前鋒畢列特、高禾、中場祖卡利查干尼缺陣，守將安高拿又話未必出得，三線缺人下好難爆冷啫！

相反PSG喺歐聯出局後未有洩氣，上場作客贏特魯瓦加上馬賽失分，聯賽錦標可謂十拿九穩。依家佢哋唯一目標就係要爭做雙料冠軍，以佢哋聯賽3連勝嘅氣勢，加上中場莫達已經復出上陣，今仗真係「實食無黐牙」。如果伊維恩真係貪勝不知輸，睇怕佢哋都好大機會連續第3次畀PSG大炒。