贏波即封王紅魔打爆維拉

猪拉多纳

曼城輸波奧脫福今開祝捷P 朗尼為前途踢爭氣波

「魔童」爭氣幫曼聯登基！由於曼城尋晚作客熱刺反輸1:3全失3分（詳見F7），令紅魔只要今晚主場擊敗阿士東維拉，即可提早英超封王，喺奧脫福開P慶祝！不過對於「邊緣人」朗尼今場唔只要爭冠軍，仲要為前途鋪路，無論想留隊定去另一間大會，都要踢番場爭氣波，咁嘅環境曼聯勢炒弱勢嘅維拉，1.58倍「讓主」趁熱食啦！

（有線200及300、廣東體育周二凌晨3:00直播）
表現遜香川畀費Sir換走

朗尼上輪英超對韋斯咸因為表現差勁被調離場，賽後費Sir仲大讚同位嘅香川真司表現比佢好得多，令英國《每日電訊報》、《每日快報》等媒體都認定「魔童」已經被「邊緣化」，無論佢想留隊，定真係好似傳言咁會另謀高就，剩低呢幾場賽事都要盡地一煲博表現喇！

《每日郵報》日前就影到朗尼喺操練時鬼咁落力，雙腳飛剷咩都出齊，勁有火！有佢支援剛打破入球荒、近2場都有波入嘅尹佩斯，要喺奧脫福轟散連續22場賽事都有失波嘅維拉，唔係難事吖！
維拉賓迪基欺善怕惡

作客嘅維拉就仍然喺護級漩渦苦苦掙扎，雖然佢哋前線有「單天保至尊」嘅賓迪基，但小妹發現呢位射手今季一對住阿仙奴、車路士、曼城同熱刺呢啲前列分子就即時啞火，證明只係欺善怕惡，傷愈復出嘅艾邦拉荷又未必夠態，紅魔根本唔使太擔心。何況兩軍近6次喺奧脫福對壘，曼聯贏咗足足5次，客軍唔好話想反彈搶分護級，輸少幾球已經要偷笑喇！
維拉作客例失波

曼聯今季16場聯賽主場開出11次「半場贏」。

紅魔近6次主場迎戰維拉合共攻入17球。

維拉今季16場聯賽作客只得1場冇失波。
維拉遇強必死吼「半場主勝」

阿士東維拉雖然作客2連勝，不過要留意對手全部係下游分子，相反對住前列勁旅即時見晒底，輸畀阿仙奴同熱刺唔在講吖，面對曼城同車路士更加潰敗0:5同0:8，絕對可以列入今季羞家經典。今晚靠住呢條紙紮防線出戰喺奧脫福慣性搶韁嘅曼聯，紅魔1.56倍「半場勝」少少哋當收息囉！