水手鹿角「超人大作戰」

猪拉多纳

無論鍾唔鍾意睇波，今日都會有興趣去橫濱日產球場走番轉，事關嗰度除咗有場（五）10橫濱水手對鹿島鹿角嘅日職上演，仲有個「一日超人節」活動，真係老少咸宜，呢啲做Show波開個入球大絕對唔奇。

（now711台、有線148周五下午2:30直播）

由於今年係「圓谷製作」創作超人嘅50周年紀念，一年一度嘅「超人節」搞得比過去隆重，今日直情殺入埋球場添，應該吸引到啲平時揀波嘅人入場，何況水手仲順勢推出埋7月23號友賽曼聯嘅紀念T恤，完全係一場搵錢Show，作為主隊嘅水手點敢揸流吖，而且佢哋上星期和咗甲府風林，個榜首位畀大宮松鼠搶走咗，今日點都要做番啲嘢嘅。

對賽6成開大

當然，水手因為賽程頻密，前鋒齋藤學打咗柴，馬昆奴斯上場波亦都傷出，今日踢唔踢得只係五五波，鋒線威力打咗折扣。但係佢哋自99年起20次主場迎戰鹿島，雖然只得7勝5和8負，不過就有12場波開大，比率高達六成。

至緊要一點係，對家鹿島今季有一點好奇怪，6場作客波有4場開大，反而返到主場就開細居多。其實呢班波有好多射得之人，大迫勇也、柴崎岳同達維都好弗，夠晒火力同水手玩場「超人大作戰」。