黑貓逃生睇住個細

猪拉多纳

上仗輸鑊甘 攻城唔敢急

英超護級大戰，新特蘭主場對史篤城，「黑貓」新特蘭上仗慘敗1比6，輸到大大鑊，對「狂人」領隊迪肯尼奧一盆冷水照頭淋，睇怕佢今次唔敢太放肆，尤其係施斯隆停賽，入波本錢受削下應會先做好防守，再謀反擊。史篤城今仗唔輸都收貨，亦唔會冒進，Mic少投X首選入球細。

（有線300及200台周二凌晨3時直播）

新特蘭領先排喺尾三嘅韋根兩分，再冇失分空間，理應今仗要豁出去一搏。問題係上仗護級戰「黑貓」1比6輸畀維拉，連一向高傲嘅迪肯尼奧都被嚇窒，要向球迷道歉。「黑貓」之前兩連勝，令迪帥非常狂妄，經過一役慘敗後，由天堂跌返落凡間，佢應該學識謙虛，正視球隊本身不足，特別係要堵塞防線漏洞，否則前面入埋唔夠後面輸最後功虧一簣，就算主場出擊亦唔敢壓得太上。

「黑貓」另一個問題係進攻中場施斯隆停賽，佢近三仗入兩球屬於搶分重臣，缺少呢位貝寧國腳，鋒線得番丹尼格拉咸，未免太單薄，經常靠中場後上幫手攻門，威力難免打折扣。
史篤城作客「穩字派」

史篤城連續兩場小勝，其實只領先新特蘭三分，慶幸仲有紐卡素、諾域治、修咸頓等球隊墊底，餘下三仗只要唔嚴重失準，應該可以留喺英超。因此，領隊佩尼斯應會穩字行先，唔輸波已經足夠。特別係吸取英聯盃被當時迪肯尼奧領軍嘅史雲頓淘汰教訓後，佩尼斯今仗更加會打醒十二分精神，以免重蹈覆轍，如此場合入波唔慌多，捧細盤好路。