羅馬搶玩歐戰要割禾

猪拉多纳

意甲快車賽期首場比賽，由羅馬主場對基爾禾。羅馬自四月起至今未輸過，球員爭分意欲強，好明顯對來屆歐洲賽資格相當之渴求。基爾禾位列中游，護級壓力輕微，今場未必會太過進取。季尾揀波鬥志行先，羅馬要搶分兼主場出擊，利好條件充分，可望大勝基爾禾，「讓球主勝」可捧。

（周三凌晨2時45分開賽）

先交代雙方軍情，羅馬門將盧邦因上仗對費倫天拿撼傷鼻骨，醫生認為再落場比賽可能導致移位，今場休息機會較高。至於荷蘭門將史基倫堡又處於養傷階段，故今場會用烏拉圭嘅居高伊舒亞富拿把關。基爾禾就有兩位前鋒柏利斯亞及柏路斯治受傷，料對入球能力有影響。縱然羅馬要用到後備門將，但對球隊爭勝唔會有太大阻力。
增收益保飯碗

除近期走勢較佳之外，羅馬亦需要透過歐洲賽去賺錢。其實現任羅馬會長占士普洛達係一名高風險金融投資者，正式係三更貧，五更富。故此占士普洛達好希望羅馬可以做到自給自足，唔使成日要佢注資過活。球員明白到老闆並非賣石油嘅中東酋長，冇能力攞幾億港元去買巨星，為保住羅馬唔會因財政問題導致倒閉，未來日子惟有要靠自己，努力搶分以奪得來屆歐洲賽資格，令球會賺取較多收入。