特魯瓦弗爆唔赦波爾多

猪拉多纳

今晚舉行嘅法國足總盃4強，由特魯瓦主場迎戰波爾多。表面上特魯瓦身陷降班漩渦，唔似得上咗岸嘅波爾多可以專心盃賽，但既然差一步就可以爭冠軍，狀態唔錯嘅特魯瓦又點會咁易投降先，今鋪有得受讓，1.62倍「讓主」捧得過。

（開賽時間：周三凌晨2:55）
波爾多近9戰僅2勝

所謂「寧買當頭起」，特魯瓦最近狀態Sharp醒，連盃賽在內4戰3勝，加上佢哋近8次主場出擊，只係輸過畀巴黎聖日耳門，就連聖伊天都要喺佢哋地頭失分，就知特魯瓦主場威力有幾勁啦！佢哋一對箭頭巴希碧克、穆罕默德耶泰拿仲係咁入波添，主帥科能見到班手足踢得咁順，賽前都講明唔會留力護級，入到決賽先再算，鬥志靠得住。

波爾多近9戰贏得2場，狀態麻麻，今晚又有兩大中場主力施迪同守將泰莫連拿斯缺陣，睇埋佢哋個晉級過程，根本未受考驗，對手最強都只係乙組球會朗斯同查多魯，對住低組別球隊羅恩仲要靠12碼先贏到，咁嘅表現，好難叫人支持佢哋啫。