維拉係時候劏車雪恥

猪拉多纳

阿士東維拉上年平安夜作客車路士慘吞八蛋，創下球會英超史上最大敗仗，愧對江東父老，相隔唔夠半年，佢哋今晚主場迎戰車路士，既要護級，亦要復仇，決心極大！車仔連拚多場，嚟緊周中仲要出戰歐霸盃決賽，點都要留吓力，作客讓半一過火，今場可博下盤！

（有線200及300台周六晚7時45分直播）

阿士東維拉貴為英超老牌球會，至今已有近140年歷史，近年雖然唔係甚麼超級勁旅，但起碼都可企穩英超中游，絕不失禮。不過，佢哋上年經歷一個令人不安嘅平安夜，當日喺史丹福橋球場輸吓一粒，輸吓又一粒，最後捧走八隻光蛋，呢場係球會英超史上最大敗仗，一戰傷盡粉絲心。
車仔留力爭歐霸

維拉下半季力戰下總算有起色，逐步解除護級危機，現時餘下兩輪聯賽，佢哋有四十分在手，領先尾三韋根五分，半隻腳上咗岸，當然，最好梗係再搶多啲分真正保住英超席位啦。論近況維拉長期見勇，進攻鐵三角賓迪基、艾邦拉荷同安祖斯韋文水準穩定，今次主場再戰仇家車仔，將會全力爭勝挽回面子。

車路士近期長期一周雙賽，話就話有輪換但查實用來用去都係嗰十零個主力，難免會有疲態，上場賽和熱刺後，教頭賓尼迪斯都話班兵尾段走唔郁，今次對住維拉班生牯仔好惡搞。車仔嚟緊周中要應付歐霸盃決賽，嗰場先係「戲肉」，預期「肥賓」今戰會半力出擊，讓到半一真係信唔過！