韋根綵排成功再等奇迹

猪拉多纳

今年係英格蘭足總成立150周年紀念，可以適逢其會有份踢足總盃決賽係每個球員嘅夢想，亦令一場本來實力懸殊嘅決賽增添變數，曼城背負巨大壓力去爭今季唯一冠軍盃，但韋根就輕裝上陣只求踢番場緊湊嘅決賽。
曼城「心態問題」遇弱陷苦戰

睇往績韋根冇得同曼城鬥，近7次對撼輸晒兼冇波入，對上一次入曼城波已經係09年嘅事，所以領隊馬天尼斯專登用上個月作客曼城場波當係決賽綵排，嗰場波畀佢哋捱到83分鐘先至失守，呢場肯定照辦煮碗等待奇迹出現。

曼城為今場決賽做足準備工夫，周中英超收起8個正選險勝西布朗。不過「藍月亮」今季好多時對中下游球隊都陷於苦戰，入波能力嚴重下降，領隊文仙尼歸咎冇運，但其實係球員心態問題，尤其喺決賽場合萬一久攻不下，隨時愈踢愈急自亂步伐，好考文帥臨場調兵遣將功力。睇番以前，韋根護級往往都有貴人相助，但今季似乎係九死一生，球員降班前孤注一擲肯定搏甩髀。