踏浪而來配搭強

猪拉多纳

　　谷草C+3欄唔能夠唔服 ！ 唔揀內檔馬勢係假。阿棟唔係數據派，總係覺得睇馬匹臨場狀態最重要，但馬弗又點，檔位形勢唔就，點叻都冇用，一樣惡唔出樣。所以，今期揀馬策略，檔位好壞係一個重要考慮因素，當然，死馬排好位亦唔等於一切。

　　第三場四班1200米。「好香港」轉到李易達馬房之後，一直操操停停，受到腳患問題困擾，進度未必在高點，但本身實力超出第四班，剛仗能力迫三班頭馬「橫掃千軍」，冇理由留在四班冇運行。希望有八九成狀態，加埋韋達留放搭夠，可以贏番場。

　　第六場三班1800米。「踏浪而來」計賽績嚇親人，上季贏緊二班賽，今季竟在三班跑極唔贏，唔通4歲會退化？當中發生咗乜事，真係唔清楚，但上場又真係切切實實後上入圍，表現唔錯，話唔定係狀態復甦先兆，而今次引到韋達操刀，同樣係正面支持點。但要提提大家，始終呢匹係失準馬，賠率太熱唔值博，4倍左右先好博WP。

　　第八場三班1650米。「超勝多」今季連跑多場，贏唔到且上名次數極少，但經常輸得接近，可能實力係得咁多，但呢類馬往往在季尾階段好使好用，因為之前搏得唔多，分數又唔會處於飽和水平，如果同場實力馬有咩差池，就係佢上位之時。

　　點買法

　　「踏浪而來」係全晚最佳馬膽，不過，由於韋達效應，可能會愈賣愈熱，如果捧到3倍或以下，阿棟一定唔幫襯，因為熱得嚟冇水位，若果係咁，做QT膽好過嘞。