返璞歸真大溪地精神

猪拉多纳

今屆洲際國家盃最具話題性球隊一定係大溪地，以波論波，大溪地嘅足球水平的確處於低位，始終都係業餘波，對足球認知度唔高，好難期望佢哋有突破性演出。Peter細心睇過佢哋兩場比賽，防線唔單止鬆散，球員仲成日企錯位，某程度上係一個反面教材。老實講，今次大溪地喺洲際國家盃亮相，帶畀球迷並唔係足球智慧，而係提醒大家，原來地球仲有一片安逸樂土。
與世無爭 情操高尚

現今城市人生活緊張，每日庸庸碌碌忙個透不過氣，當滿腦子都裝滿數字時，已經唔記得大自然嘅存在。Peter從大溪地球員當中，體驗得到一種純樸，一種與世無爭嘅生活態度。就算佢哋踢緊洲際國家盃，你都唔覺得球員好有競爭性，又好易滿足，當日對尼日利亞取得一個入球，已令球員歡喜若狂，好似捧盃一樣。最令人驚訝係佢哋仲會向對手送上紀念品，希望從比賽建立友誼。我哋中國人有句話叫仁者無敵，即係話心中再冇敵人存在，大溪地球員就有呢種崇高情操。與世無爭嘅地方已經唔多，大溪地好適合大家去旅遊或者享受退休生活。

大溪地最後一輪對烏拉圭，相信烏拉圭會(目及)住同時間開波嘅西班牙對尼日利亞，一於睇定嚟食以免浪費體力。Peter建議菠菜者唔好咁衝動，以為烏拉圭會以超大比數狂炒大溪地，一路睇住戰局發展至落注就較為明智。
金句：並非烏拉圭入球Show咁簡單