伯利茲爆被誘金盃打假波

猪拉多纳

美洲金盃爆假波醜聞！伯利茲多位球員尋日爆料，話有不法分子吼準呢支小國球隊莫財，多次利誘佢哋打假波。伯利茲球員證實當佢哋抵達危地馬拉機場，準備轉飛美國嗰陣已有人接觸佢哋，到咗美國後，嗰位中間人再次試圖說服佢哋喺美洲金盃C組首仗輸畀美國。

伯利茲後衞基尼亞表示：「佢都知我哋贏唔到美國，但想確保我哋輸波，事成之後，會畀我哋一筆巨額金錢，足以改善全家生活水平。」有傳媒指賄款為1萬歐元（約10萬港元），但被伯利茲球員拒絕，門將韋斯特更反勸對方死心，因為球隊一心為國家榮譽比賽。球壇假波愈爆愈多，尋晚西班牙聯賽會又話6月8號桑坦德3:0贏靴高斯一場西乙懷疑係假波，將會展開調查，桑坦德當然率先否認有踢假波。
「洪」「薩」戰吼「入球細」

雖然有負面消息傳出，不過聽朝上演嘅金盃B組大戰一樣好路，洪都拉斯喺首戰贏海地2:0，咪以為佢哋實力佔優，實情埋門比人少一大截，入肉攻勢欠奉。今仗對住成班球員肯跑肯守嘅薩爾瓦多，未必開到入球騷，吼1.57倍「入球細」穩陣啲。

（有線201台、61台周六早上9:30直播）