阿仙奴省招牌 -2炒印尼明星隊

猪拉多纳

今晚印尼明星隊對阿仙奴嘅熱身賽，又有直播睇喇！雖則印尼明星隊陣容有些少睇頭，不過佢哋講明今場志在為10月對中國嘅東亞盃外圍賽熱身，娛賓至上勝負未必睇咁重。「兵工廠」近排買咩人都唔掂，當然要落力省番靚個「爭標招牌」吸引球星加盟啦，「-2」照捧1.68倍「讓球客勝」！

（亞視本港台周日晚9:30直播）

今次印尼明星隊陣中，有踢過布里斯班獅吼嘅射手沙治奧雲迪克壓陣，佢本身喺荷蘭出世，但由於有印尼血統，今年開始答應為印尼國家隊上陣，領隊積遜賽前亦狂練進攻戰術，照計可以為剛啱放完假嘅阿仙奴帶嚟威脅。
10月鬥國足 印尼喪攻試陣

不過積遜同時話：「我哋有啲新球員，希望可以搵出10月對中國最合適組合。」據聞賽前大批球迷爭買黃牛飛，印尼明星隊擺明要用進攻足球娛樂球迷兼試陣，大敗都唔理啦！

最近「兵工廠」想話買希古恩、朗尼同蘇亞雷斯，畀人感覺真係得個傾字，成事機會根本好微。鬼咩，近年佢哋可以話冇晒爭標霸氣，就算畀得起轉會費，都好難說服搶手球星加盟，為咗避免焗簽二打六球員頂檔，阿仙奴領隊雲格絕對有需要落柯打，要求球員喺熱身賽證明實力，等人知道佢哋有心爭標，如果唔係？真係咪使旨意簽到想要嘅球員喇！
雲格證爭標野心引球星加盟

當然，印尼嘅悶熱天氣對歐洲球員嚟講，的確幾惡頂，之不過阿仙奴有禾確特同張伯倫輪流硬爆，應該可以製造好多埋門機會。

再講，除咗雲格要證明爭標野心吸引球星加盟，前年「兵工廠」以4:0炒馬來西亞明星隊，上年再遇竟然只係險勝2:1，個人認為只係意外，冇理由阿仙奴連續兩年熱身賽頭炮失威啩？就算謝雲奴、辛迪卡索拉同華美倫未歸隊都唔怕，始終基奧特仲要搏命證身價，等雲格唔使成日話要買前鋒嘛！