東亞賽今晚6:00開波 太極虎狂咬袋鼠

猪拉多纳

世盃考牌試國腳Show Quali

東亞錦標賽今晚Kick Off，東道主南韓會喺位於首爾嘅揭幕戰迎擊澳洲，呢隻「太極虎」講唔上係強陣出擊，但新帥洪明甫就成功撻着一眾國腳團火，加上佢老人家講明會以今屆賽事作為世盃大軍嘅考牌試，對住怨聲載道兼甩皮甩骨嘅「袋鼠兵團」，1.8倍主W當然捧得過啦！

（now633及635台、中央5台周六晚6:00直播）

今屆係第5屆男子東亞錦標賽，南韓、澳洲、日本同中國4隊會以小組形式互相對壘爭逐錦標。上個月先接掌南韓嘅前U23主帥洪明甫，今次首度領軍參加大賽，除咗話想省靚招牌之外，仲話明會藉今次賽事考核球員個人技術同執行戰術能力兩大範疇，從而敲定出戰巴西世盃陣容。
重紀律Dress Code入營

一班南韓國腳禮拜三去到位於坡州嘅國家足球中心開操，據《南韓聯合新聞社》透露，主帥洪明甫好注重球員紀律，勒令國腳以老西Dress Code入營，仲要泊架車喺足球中心門口大閘，落車步行300米進入宿舍，希望用呢段短短嘅路程，令球員醒覺為國賣命係幾咁神聖。

時隔8年終於重返國家隊嘅濟州聯射手徐東炫，更加係第一個去到國家足球中心報到，佢話希望把握機會取悅洪明甫，由佢夥拍翼鋒廉基勳同埋目前喺韓職攻入12球嘅中鋒金信煜攻堅，火力絕對有保證。
球會唔放人澳洲鬧兵荒

雖然朴主永、孫弘民、寄誠庸同李青龍等歐洲外流球員冇份入選今次東亞錦標賽大軍，不過首度參賽嘅澳洲仲濕滯，幾位外流球員好似後衞干夫韋迪、賴恩麥高雲等都因為所屬球會阻撓，截至前晚都未知今仗可唔可以披甲，就連最有卡士嗰件射手約舒亞堅尼地都因為名古屋鯨魚企硬唔放人而無緣參賽，領隊奧斯克日前嬲到話想罷踢，事後經澳洲足總氹番先決定帶隊出賽，陣營士氣同戰鬥力都咁曳，今戰唔睇好啦！