美斯預咗再畀仁恰

猪拉多纳

殘陣征安聯 巴塞未Ready

安聯球場爆發漢尼斯盃重量級熱身賽，上季三冠王拜仁慕尼黑主場迎戰地上最強巴塞隆拿，不過巴塞賽前準備時間不足，連一場熱身賽都未踢過，有份參戰洲際國家盃決賽嘅10名西班牙同巴西國腳仍然放緊假，今晚只由美斯帶領一班副選同青年軍出師，殘陣作客逾7萬座位全場爆滿嘅安聯球場，根本唔夠已經上晒力既拜仁砌，黑柴強捧拜仁「讓球主勝」。

（亞視本港台周四凌晨零時30分直播）
哥迪奧拿倒戈肉緊

今場比賽由於撞正歐國盃女足準決賽瑞典對德國，為咗遷就德國電視台直播安排，所以較原定時間提前兩小時開賽。拜仁季前準備工夫做到加零一，上月26日已經開操，經過本月初意大利集訓，至今已踢過8場熱身賽，取得全勝合共轟入59球，前幾日電訊盃先後輕鬆以4比0同5比1大炒漢堡同有主場之利嘅慕遜加柏，成班波已經着晒火，而且超班程度令人驚嘆。

今場呢個盃打正球會會長漢尼斯牌頭，加上上季攞到完美成績，新帥哥迪奧拿難免受到沉重壓力，呢場係佢領軍後首場喺安聯球場上演嘅重要賽事，又面對舊主巴塞隆拿，真係想唔加多兩錢肉緊都幾難。
尼馬等10主力仍休假

基於西甲球季較遲展開，巴塞隆拿上星期至復操，但陣中西班牙同巴西國腳早前參加洲際國家盃，陣中10名主力包括域陀華迪斯、丹尼爾、碧基、佐迪艾巴、布斯基斯、沙維、恩尼斯達、法比加斯、柏度洛迪古斯同新加盟嘅尼馬都獲准延長假期，今次並冇隨軍去德國。

另外，箭頭韋拿轉投馬體會，中場堤亞高艾簡達拿更倒戈加盟今仗對手拜仁，巴塞今仗殘陣出擊，加上剛開操又受到主帥維蘭路華因病突然辭職風波打擊，影響賽前備戰，連原定對波蘭列治亞嘅比賽都要延期，今場只係佢哋新球季第一場比賽，根本未Ready，黑柴深信拜仁今場大勝可期。
拜仁新兵

卻治賀夫

馬里奧葛斯

堤亞高艾簡達拿
巴塞新兵

尼馬