國足爭氣波博客Ｗ

猪拉多纳

袋鼠兵爭標無望出副選
在南韓舉行的東亞錦標賽「男子組」今日上演最後一輪，頭場中國硬撼澳洲。國足喺臨時主帥傅博帶領下，今屆兩戰未輸過，表現漸入佳境，由於佢哋仲有爭標機會，點都會咬埋最後一啖氣搏到盡，希望一洗早前屢戰屢敗嘅恥辱，況且「袋鼠兵」今非昔比，更表明會派副選出戰，今次仲唔益晒國足？中國嘅客勝有2.47倍分頭，非常值博。

（now 633及635周日下午4時15分直播）

早前中國國家隊不但敗給烏茲別克及荷蘭，6月15日更以1比5輸畀泰國二隊，被稱為「615慘案」，陷入史上新低潮。正所謂知恥近乎勇，在臨時主帥傅博帶領下，國足球員決心做番齣好戲，先後逼和兩大勁旅日本及南韓，依家只落後榜首嘅日本兩分，今仗贏波仲有爭冠希望。相反，澳洲兩戰得一分冇嘢好爭，賽前領隊奧斯克講明會安排未曾亮相嘅副選登場，實力、戰意大打折扣。

睇番國足之前兩次捧走東亞賽錦標，咁蹺都係由高洪波及朱廣滬兩位土帥領軍，而傅博亦甚得眾將歡心，面對讓晒車馬炮嘅「袋鼠兵」，定必搏盡爭勝，幫傅帥擸番個冠軍之餘，兼為國足重新正名，客勝有分頭值博。

南韓冇料讓日本
至於尾場南韓主場火併日本，由於日本領先第二及三位嘅中國及南韓兩分，今仗贏波即可捧盃，甚至打和都有機會奪冠，以日本高一線嘅實力，要力保不敗，應該唔成問題。南韓雖然都有幾位國腳喺日職搵食，但都只屬二流角色，竟然兩場都打和0比0，連對住以往視為「私房菜」嘅中國都贏唔到，可見呢支「太極虎」根本係「病貓」。南韓形勢迫使下焗攻，隨時被質素上乘嘅日本進攻好手反咬一口，日本受讓可吼「讓球客勝」。（now 633及635周日晚7時直播）