拜仁超班「-2」照W

猪拉多纳

葛斯復操強陣打殘慕遜加柏
新一季德甲今晚開咧喇！開鑼戰由上季「三冠王」拜仁慕尼黑主場迎戰慕遜加柏。今季改由哥迪奧拿領軍嘅拜仁依家仲融合緊，不過佢哋實力超班，新兵馬里奧葛斯又已經復操咗成個禮拜，今場有望後備落場騷「哥利」。慕遜加柏喺德國盃就連丙組仔都贏唔到，拜仁讓2球1.8倍「讓主」照捧可也！

（有線61及201、中央5台周六凌晨2:30直播）

哥迪奧拿上任拜仁後大改革，雖然備受質疑，但佢哋除咗喺德超盃輸畀多蒙特外，其餘熱身賽都贏晒，當中仲包括巴塞隆拿同曼城呢啲強勁對手。

洛賓賣口乖同哥帥好傾
本周初喺德國盃大炒列頓，踢正前鋒嘅湯馬士梅拿更連中三元，似乎佢已經逐漸適應呢個新位置，搞到上季踢到曉飛嘅文迪蘇傑都要做後備！睇嚟哥帥嘅策略係，拜仁一旦攻唔入，就用文迪蘇傑高空轟炸，難怪連高層路明尼加都話明，一定唔會拎「文仔」嚟交換多蒙特嘅羅拔利雲度夫斯基，始終有多啲進攻瓣數，先係入波保證嘛！

慕遜未夾熟輸畀丙組仔
洛賓日前受訪就話佢同哥帥好好傾，又話唔介意安排佢踢咩位，咁識做，今晚必定繼續得到重用。而且拜仁今季仲加多個「德國美斯」馬里奧葛斯，佢已經傷愈復操，話晒呢場係哥帥首場德甲，班球員點會唔搏命幫老細響頭炮呀？

慕遜加柏教練法夫爾今夏簽入拉菲爾基達奴同麥斯古斯兩位進攻能手，本來牌面唔差，弊在融合得麻麻哋，德國盃首圈對住德丙嘅達斯泰特連波都入唔到，互射12碼仲輸埋出局。雖然繼續留隊嘅門將達史特根係有料之人，但對住拜仁就算有三頭六臂都難救啦！

頂占筍盤：拜仁（讓球主勝）

乜都玩錦囊
拜仁大炒格3.5球照捧大

今季拜仁改由哥迪奧拿執教後，頭炮德超盃已經失手，哥帥係聰明人，都知道開咧戰唔贏番鋪勁，好難平息民怨，以拜仁嘅超強火力，試問又有幾多隊頂得住？就算話今場入球大嘅中位數升到3.5球，1.85倍入球大睇怕都冇乜走雞。

Data King：拜仁主場10連勝
拜仁近6次主場對慕遜加柏取得4勝1和1負。

拜仁主場連贏10場。

拜仁連續3次主場對慕遜加柏開「入球細」。