寸王預言一統英超

猪拉多纳

莊家撐車睇淡曼市雙雄
經過曼市雙雄連續3年雄霸英超，「寸王」莫連奴終於重返呢個全球最激烈嘅足球戰場，根據各大莊家賠率，車路士係今季英超冠軍大熱，曼聯同曼城好可能讓位，而且莫連奴睇好佢兩個哎吔徒弟羅渣士同保亞斯，分別帶領利物浦同熱刺再起風雲，莫氏王朝有可能統治英超！

04年莫連奴離開波圖首次執教車路士，登陸英超首季就揮低由費格遜領軍嘅曼聯，帶領車仔事隔50年重奪頂級聯賽錦標，今次佢重返倫敦，甚至當正自己係英超最高權力：「現時英超當中，只有我同時拎過歐聯同英超冠軍，隨住費爵爺退休，我會成為英超中嘅『教父』，肩膀上有更多責任。」

莫連奴自誇英超教父
事實上，上星期數據公司彭博體育表示，經過超級電腦分析嘅結果，車仔今季會成為英超冠軍，而且各大菠菜公司都有一致睇法，大部分開出車仔同曼城並列3.25倍冠軍大熱，曼聯有3.5倍排第3位，立博仲開車仔3.2倍，只得足智彩唔跟大隊開曼城冠軍賠率得2.5倍，所以唔怪得莫連奴咁牙擦。

除此之外，當被問到邊隊威脅到車仔，莫連奴只係Hea答曼聯同曼城依然好勁，阿仙奴可以踢得更好，但提到跟過佢做助手嘅兩個哎吔徒弟，就有好多偉論，佢覺得羅渣士會撐番起紅軍：「點解利物浦唔可以贏聯賽冠軍？羅渣士好有料，上季佢已經實現自己嘅諗法，咁點解唔可以係利物浦？」

撐「徒弟」睇好熱刺 紅軍
至於曾經傳出被皇馬睇中嘅保亞斯，莫連奴覺得佢有條件創造英超歷史：「熱刺又點解唔可以攞冠軍？因為佢哋未攞過？呢個唔係重點，最重要係佢哋有好強勁嘅陣容，而且今年係保亞斯第2年為熱刺領軍。」講咁多嘢，寸王都係想話畀大家知，佢嘅足球哲學天下無敵，跟過吓佢已經勁過好多人呀！