卡素爾斷箭撐高地先入波

猪拉多纳

英甲球隊卡素爾今季認真大鑊，開鑼戰已經有最好波嗰件射手李爾米拿「見紅」，今晚冇咗佢衝鋒陷陣，預期球隊會繼續任由對手魚肉，主場撞正鬼咁「猛火」嘅高雲地利，相信好快就頂唔住對方進襲，第一隊入球梗係捧1.86倍嘅高雲地利啦！（開賽時間：周六晚10:00）

計埋聯賽盃在內，卡素爾開季3戰勁失12球，領隊艾保特決定逼奧漢隆復出止血，但呢位後防大將因為膝傷已經缺陣咗成個月，一場季前賽都冇踢過，夾硬落場咪盞愈幫愈忙！再講吖，主力射手李爾米拿要坐波監，翼鋒馬迪笠臣又話上陣成疑，真正係攻不銳守不穩。

對家高雲地利嘅一對鋒將李安奇勒同哥林威爾遜，開季至今夾埋攻入4球，領隊派士利賽前簽埋雷丁前鋒曼錫，希望呢位前法國U21射手可以製造良性競爭，李安奇勒同哥林威爾遜為保正選席位，今仗肯定繼續搏命爭「士哥」。睇埋數據，高雲地利單計上季英甲有27次先入波，造訪開季英甲兩戰都先失波嘅卡素爾，先開紀錄機會高唱入雲。