大豪客熱刺 玩殘戴拿模

猪拉多纳

喪燒16.2億增兵頂巴利

歐霸盃附加賽首回合今晚連環爆發，格魯吉亞嘅第比利斯戴拿模喺主場對英超嘅熱刺，注定冇運行。熱刺預見賣走加里夫巴利後大把錢，今夏係咁買人頂佢個位，總使費隨時有成16.2億港元，燒錢燒得仲勁過曼城，唔入歐霸盃分組賽幫補吓點得呀？熱刺實力超晒班一於捧2.1倍「讓客」。（開賽時間：周五凌晨0:00）

熱刺將肯搏又實用嘅柏加賣到富咸，老實講幾令我意外，但原來領隊保亞斯已諗定點換血，啱啱就簽入巴西球星韋利安，跟住又話想買埋羅馬前鋒拉美拿，今夏轉會使費隨時高達1.33億鎊（約16.2億港元）。雖然韋利安今晚唔會落場，但好似基菲爾施古臣、迪比利同賀治比等中場唔想冇碇企嘅話，依家就梗係搏命爭取表現啦！
爭入歐霸分組賽賺錢幫補

英國傳媒話，保亞斯食錯藥式瘋狂買人，原因係高層已經傾好以「癲價」出售加里夫巴利去皇家馬德里，但保亞斯依家不顧一切燒錢，當然係有信心殺入歐霸盃分組賽搵錢幫補吓，確保熱刺財政健康啦，否則抽到上上籤都晉唔到級，就真係好難向董事局交代，況且熱刺依家成籮球星，捧埋隻歐霸盃就更加威水啦！
格魯吉亞班霸外援冇料到

對家第比利斯戴拿模係格魯吉亞最成功球會，上季重奪聯賽冠軍，仲喺1981年攞過停辦咗嘅歐洲盃賽冠軍盃冠軍，都算風光過。問題係，第比利斯戴拿模家陣得兩個西班牙外援，同樣効力過貝迪斯嘅中場悉斯高同後衞烏斯達列斯見得吓人，今季最昂貴收購只係價值25萬歐元，AEL利馬素嘅科特迪瓦前鋒禾豪，財力蚊髀同牛髀，邊似爆得出呀？
歐霸盃賽制

採主客兩回合制，現為附加賽首回合。若兩回合計打和，計算作客入球優惠，未分勝負將於次回合法定時間後加時30分鐘，加時階段仍計算作客入球優惠，再和則互射12碼決勝。