迎戰浦和搞作多 清水送「輸」玩「大」咗

猪拉多纳

好派唔派派書（輸）咁擇使？早兩日向靜岡市派咗批書嘅清水心跳，今日主場對住浦和紅鑽，真係想贏都難，至多係入番對手一、兩球，所以呢場日職不妨博個1.62倍入球大。

（有線64及203周六下午5:00直播）

依家排喺日職13位嘅清水，非常重視今場波，早兩日仲派咗啲人去JR島田、燒津、藤枝車站派傳單，提醒啲球迷記得捧場。唔只咁呀，响禮拜二嗰日，清水仲向靜岡市立圖書館，贈送14本球會創立20周年嘅紀念冊，呢本220頁嘅大製作，有齊晒清水所有紀錄、名將介紹同訪問，由當日開始市內12間圖書館都可以借到嚟睇。
紅鑽上仗落後3球照反勝

搞咁多嘢， 清水贏梗咩？如果齋睇往績，佢哋有權講句咁嘅說話，事關清水主場17次對浦和，取得10勝2和5負，勝率將近有6成。問題係此一時彼一時，今季清水表現反覆，入得又失得，近8場波除咗對FC東京同友賽馬來西亞，場場波至少有4球交收，買佢贏不如博佢大好過。

對家浦和紅鑽家陣排第3位，對積分榜10名打後嘅球隊甚少失手，首循環主場輸畀清水，都係因為留力亞冠盃嘅關係，上場波對大分三神能夠响落後3球反勝4:3，完全見到呢班波嘅霸氣，爭取連續3場入波嘅興梠慎三、有元口元氣、馬斯奧李察迪斯幫手，真係有權省爆清水個龍門，博大啦！