史浩克焗攻大鬧PAOK

猪拉多纳

新季歐洲聯賽重開，其中一隊表現最令細鬼失望嘅，係德甲史浩克04。呢支傳統勁旅好似食錯藥一樣，前面入埋唔夠後面輸，不單聯賽曳到震，歐聯附加賽首回合一樣被逼和。聽日凌晨次回合史浩克作客PAOK，「藍軍」毫無保留焗攻，捧大盤最好！（有線64及203台周三凌晨2時45分直播）

史浩克去季攞德甲第4，而且歐聯亦打入16強，細鬼對呢支攻力強勁嘅球隊留有好深印象，球隊箭頭亨特拉爾有卡士，而法芬、達斯拿亦都好波，右閘內田篤人更加攻守兼備，不過，史浩克今季好唔順，後防尤其渣到爆，3場聯賽竟然失足9球，係目前德甲失波最多嘅其中一隊。歐聯附加賽對PAOK，諗住係好籤啦，但首回合佢哋浪費多次入波良機，後防又犯下低級錯誤，最終畀前車路士球場史度治建功，最終打成1比1平手。
冇「獵人」都唔擔心

失咗個作客入球，史浩克今次造訪希臘冇得諗一定要攻，事關入唔到波就同歐聯拜拜。雖然「獵人」亨特拉爾繼續因傷缺陣，但計進攻球員級數同決心，細鬼唔擔心史浩克入唔到波，後防方面大將哥拉辛拿斯繼續倦勤，PAOK有力入波，今場歐聯生死戰捧大盤最啱！