曼城搵無牙老虎出氣

猪拉多纳

群星自保氹番比歷連尼

侯城都算唔好彩嘞，今晚佢哋會造訪曼城，呢支「億萬大軍」剛啱先輸完畀卡迪夫城，今仗對住另一支升班隊伍「老虎仔」，試問點可以再失威？曼城領隊比歷連尼賽前「靠嚇」大打心理戰，目的就係希望門將赫特同射手迪斯高醒醒定定，佢兩個為保正選實會做番齣好戲，主場對住侯城肯定殺無赦，讓2球照捧2.2倍「讓主」。（now621台周六晚7:45直播）

曼城上周日輸畀「火龍」2:3，出迎失誤嘅赫特同兩次走漏費沙甘保嘅薩巴列達係罪魁禍首，賽後比歷連尼插完條防線之後，強調用人唔會理名氣，暗示彭迪利蒙同射手尼格度都有機會擔正。英國傳媒估計佢老人家係想畀說話赫特同迪斯高聽，姑勿論比歷連尼係「靠嚇」定抑或動真火，赫特同迪斯高為求自保，老虎蟹都要「騷哥利」證明實力。
侯城死火箭頭孭唔到飛

雖然話隊長高柏尼要到下個月中先可以復出，不過拿斯達錫今仗可以候命，米卡李察士亦已經復操，即係話比歷連尼唔使再搵查維加西亞客串中堅。防線兵荒暫時紓緩，耶耶托尼就唔使成日瞻前顧後，可以放膽殺上前場輔助阿古路同迪斯高一對箭頭，預期戰況會幾一面倒。

新季兩戰只係入得1球嘅侯城，今仗仲有前鋒恩歷克沙保坐波監，取代佢擔正嘅丹尼格拉咸，已經連續1,056分鐘喺英超冇波入，證明呢隻「老虎仔」真係冇牙，布魯士帶隊去到曼城地頭實唔敢貿貿然搶攻。況且「老虎仔」係靠占士謝斯達同居迪斯戴維斯兩件「二打六」孭起防務重任，一對閘艾穆罕默迪同美羅費古羅亞又擅攻不擅守，有上冇落，隨時畀大衞施華同捷西斯拿華斯兩位「發電機」玩殘，今鋪對住一肚火嘅曼城想輸少球都難。
藍月亮地頭場場入波

‧迪斯高係今季英超射門最多球員（10次）。

‧「藍月亮」曼城對上51場英超主場賽事都有波入。

‧侯城前鋒丹尼格拉咸嘅英超入球荒達1,056分鐘。