小林夜雨唔似熱身

猪拉多纳

　　首日賽事，大熱門成績有得有失，半數上名或勝出，冇特別側埋一邊。輪到谷草首次賽事，形勢唔多通透，尤其較後場次，感覺好混亂，可能會連爆幾場。

　　今晚喜歡兩匹韋達坐騎，先講第二場「威水福星」，前季豐收，一季之內贏4場頭馬，上季付出代價，連跑十幾場獲1P，能在季尾上名，未必因為當時賽事水準，或者，經過大半季回氣，漸漸由低谷重上軌道。今次出戰五班賽，年半有多長居四班，忽然遇到另一批弱旅，攻擊力即刻彈起，係驚11檔會唔會考起呢對人馬；第四場「小林夜雨」，身形纖細，勤跑難保持，儲足氣力搏一兩場，先至係明智做法，而今次季內初出，沈集成安排唔似對上兩季先跑短，應該唔似熱身格。

　　尾兩場1檔馬「帝國勇將」和「綠豆爽」，總係有戒心，前駒在外地或在港，初出未叻過，況且，休後體重不升反跌，更加唔係好現象；後駒三班不足，一哩的路程性能又及不上1800米，今場求熱身居多，等下次增程、落班才吼未遲。（阿興）