奧斯爾帶兵食賽

猪拉多纳

死亡F組困獸鬥今晚響鐘

歐聯「死亡F組」場場都係「困獸鬥」，今晚Round1「響鐘」！藉住好波之人「大眼仔」奧斯爾加盟，令人氣極速反彈嘅阿仙奴，將會作客硬撼法國勁旅馬賽。「兵工廠」除咗「大眼仔」有料到之外，艾朗藍斯近期演出亦大熟大勇，今仗重臨福地，決定唔做「死神」變身「食神」，煮餐靚「賽」益街坊，小讓平半非常值博。

（有線61及201台周四凌晨2時45分直播）

「奧斯爾效應」認真犀利，不但令阿仙奴波衫銷量爆升，從上仗對新特蘭所見，「大眼仔」傳送獨到針針拮到見血，令「兵工廠」進攻組織全面升呢，雲格豪花5,000萬歐元買佢返來，確係物有所值。奧斯爾嘅無私球風，同時令中場艾朗藍斯後上埋門嘅強項盡情發揮，以往佢入親波，經常有名人過身，雖然近日已經失效，但呢位昔日「入波死神」依家弗爆，神出鬼沒楔入禁區搶點、重炮狂轟世界波等招數，真係嚇你一驚。
艾朗藍斯「死神」重臨福地

馬賽季初係威係勢，但最近表現明顯回落，尤其前線太倚賴基格納同皮耶搵食，當兩人被嘜死便陷於癱瘓，連續兩場聯賽失分有辦你睇，就算有主場之利都信唔過，何況今仗重遇剋星。記得兩年前嘅歐聯分組賽，阿仙奴同樣要作客馬賽，就係憑住艾朗藍斯完場前嘅絕殺險勝而回，既然做唔成「死神」，藍斯重臨福地一於化身「食神」，拍住傷勢無礙、腳風順到冇朋友嘅箭頭基奧特，再炒碟靚「賽」氹粉絲冇難度，上盤有分頭有買趁早。

猪拉多纳