馬體會「升呢」客W抵撐

猪拉多纳

華拉度列前鋒啞火捱打格

齊心就事成！西甲勁旅馬德里體育會開季以來表現神勇，喺西甲4戰全勝竟然拍住班霸巴塞並列榜首，佢哋剛剛又同中場重心阿達杜倫續約，近排已經先後傾掂4個主力留隊共創未來，最緊要係今晚佢哋仲有前鋒殺手迪亞高哥斯達復出，有佢拍住韋拿，要作客射爆華拉度列有幾難？1.55倍客W記住要捧場呀！

（now632台周日凌晨4:00直播）
主力阿達杜倫續約

一講西甲，唔少人淨係識講巴塞同皇馬，認定每屆冠軍都係雙雄之爭，不過近年實力提升咗好多嘅馬體會，喺施蒙尼領導下，就愈嚟愈有超級勁旅風範。開季以來，馬體會唔止喺聯賽4戰全捷，周中喺歐聯又旗開得勝，唯一贏唔到，就只係西超盃兩鬥巴塞，都係和波收場。講到底，能夠主客兩鬥巴塞不敗，已經足以證明佢哋實力夠晒頂級。

人腳方面，周中歐聯坐波監嘅迪亞高哥斯達復出絕對係一大喜訊，佢同韋拿兩個默契持續進步，大家都係射得之人，話之阿祖安盧比斯因為頰骨骨折要做手術抖三周，前線火力都唔使擔心。至於中場線嘅堤亞高文迪斯有傷在身，未必踢得，不過有阿達杜倫頂住，都夠殺有餘，呢個土耳其國腳周中同球會續約到2017，係近期繼奧利華托利斯、佐治高基、查維亞文基路第4個同馬體會續新約成員，大家都做好準備為未來而戰。

華拉度列呢邊，雖然有地利，但都咪信太多，開季4戰只得4分，今季睇怕都要為護級而戰。呢班波今季只入得4球咁大把，上仗對住艾爾切連射門都唔多，呢班波攻不銳，後面就靠晒個西班牙U21國腳門神迪亞高馬連奴力挽狂瀾，對住艾爾切或者守得到，但對住馬體會，想保住清白之身唔輸波，好難囉！