新特蘭難抗紅軍尖刀

猪拉多纳

光明球場繼續黑暗

利物浦兩連敗一粒都入唔到，今晚作客新特蘭客Ｗ得嗰1.59倍，會唔會過火啲啊？「紅軍」有番蘇亞雷斯幫手鋒線全面升呢，處於無帥狀態嘅「黑貓」根本無力招架，呢隻病貓仲要冇埋王牌前鋒史提芬費查，今晚喺光明球場都係無望走出黑暗地獄，客勝熱得有道理，支持利物浦贏波反彈！

（now 621周日晚11時直播）
利物浦蘇亞雷斯飢渴

利物浦上周聯賽主場對修咸頓輸○比一，尾段反撲乏力，似樣攻門寥寥可數，全面暴露進攻中場菲臘比古天奴養傷下創造力不足嘅問題。「紅軍」鬥死敵曼聯同樣淨輸一球，但戰況完全係兩回事，佢哋喺最後階段搞到對手門前風聲鶴唳，雖敗不辱。利物浦喺短短幾日內變身，全因有番轉軚留隊嘅蘇亞雷斯喺前線造波，佢現時充滿飢渴感，拍住史杜列治及域陀摩西斯組成嘅進攻鐵三角，絕非等閒之輩頂得住。
黑貓殘陣又無王管

新特蘭炒咗上季幫佢哋護級成功嘅迪肯尼奧，確有用完即棄之感，但迪帥成日亂點鴛鴦，季初作客水晶宮一戰夠膽死搵只得英冠級數嘅池東沅同域咸攻堅，民望插水。佢仲棄用有料之人施斯隆，後者轉投西布朗後上周聯賽倒戈射瓜「黑貓」，一巴摑埋迪帥塊臉度，同時令佢冇咗份工。新特蘭新帥未定，仲有主力射手史提芬費查受傷要抖六周，波連尼就因借用條例冇得倒戈，前面得番喺聯賽食緊白果嘅艾迪杜里，算把啦！

「黑貓」近兩次主場對利物浦一勝一和，計績唔曳，但大軍開季聯賽五戰僅得一分，現時信心同狀態都處於低點，上周中聯賽盃強陣贏英甲仔彼德堡冇乜說服力，遇上急於爭取表現挽回利迷心嘅蘇亞雷斯，再輸機會好高。
領隊Chit Chat

奇雲波爾(新特蘭)：基亞卓尼利喺隊中仍然好重要，呢點唔會變，至於我自己，當然，我唔想只做看守領隊，如果可以做長工就最好。

羅渣士(利物浦)：下半場冇波入？呢個統計其實幾令我驚奇，不過，我哋當弗嘅球員嚟緊一路可以上陣，球隊唔會有太大問題。