勝風1800米顯威風

猪拉多纳

　　今次有好多馬名熟口熟面，因為佢曾經報跑9月22日賽事，隔十日八日即刻跑，係咪代表一心交代？定係有得跑就跑住先？大家唔好側埋一邊諗，凡事好壞都作打算，先至夠全面。

　　第二場四班1400米。上次好佩服韋達騎「嫡愛」手法！唔知以為係見習仔上去，嘩，出閘之後唔夠積極，直路隻馬係就係外閃，佢老哥都唔使騎到硬晒。數到最抵鬧係末段，推騎力度好似未食飯，但係咁都輸唔到兩個身位，真係令我眼前一亮，呢次加程出戰，仲唔係真波。

　　第三場三班1000米。「喜寶駒」跑4場冇W有Q，呢類馬唔好唔出，我唔使考慮狀態夠唔夠，如果未令賀賢滿意，可以唔使出得咁急，因為跑傷，先至事大。講到實力，同場邊度搵到「美麗昇華」，只要人馬發揮冇事冇幹，頭馬手到拿來。

　　第六場三班1800米。「勝風」上場末段追得勁都冇用，一來，當日唔多後上馬發揮；二來，直路曾經塞車。今次轉跑長途，上季在呢項路程想揮低「品學兼優」，三班一定夠，再講，佢已經熱身，狀態比上場更好的話，威力將會倍增。

　　「喜寶駒」熱而無味，唔買唔覺係損失。反而，「嫡愛」及「勝風」情況唔同，至少有3倍以上，整條2 x 3獨贏過關最好不過。