雙龍出海九歲告捷

猪拉多纳

告達理訓練老馬果然零舍有心得，「時尚風采」、「愛跑得」等出色例子不在話下，而尋日第二場就有匹老馬「雙龍出海」，跑到今季九歲依然老當益壯，雖然開鑼日喺梁家俊胯下落敗三甲不入，前兩季初出即勝嘅紀錄斷纜，但好在尋日換番贏馬拍檔何澤堯即刻收復失地，贏得在港出道六季嘅第四場頭馬，累積獎金衝破三百萬港紙大關，認真唔簡單。
       
雙龍出海季初特佳，沿途外疊蝕位照贏。
何澤堯有緣再贏

講起何澤堯，原來佢同「雙龍出海」特別有緣，前季佢騎「夢仙」墮馬重傷，上季就正正憑「雙龍出海」贏得復出後首W，而上季尾喺跑馬地墮馬跌斷手嘅佢，今季復出又係憑同一匹馬打開勝門，人馬出奇地合拍。告達理賽後就話表示要令老馬保養得宜，就要喼住新鮮感，所以尋日就除晒匹馬嘅配備，加埋騎練出色發揮，卒之成功重開勝門。