西維爾-1執到堡

猪拉多纳

過氣德甲兵熟路畀料

今晚咁多歐霸賽事，難免花多眼亂，阿King特別為大家揀咗場H組「西德」大戰，由西維爾主場火併弗賴堡，西維爾雖為「鬥牛國」褪色勁旅，但佢哋陣中有「臥底」杜查奧斯基、馬高馬連及拿傑迪錫等「過氣德甲兵」壓陣，實會畀好多堅料主帥艾美利，況且弗賴堡愈踢愈沉難做攔路虎，直取讓球主勝。

（有線64及203台周五凌晨1時直播）

其實兩軍皆受星散困擾，尤其係西維爾失去捷西斯拿華斯、尼格度、干度比亞等十多名主力，元氣大傷，季初表現大跌Watt都好正常，好彩主帥艾美利擅於限米煮限飯，逐漸將加美路、馬高馬連等借將融入球隊，之前於聯賽作客魯營，西維爾一度反客為主，攻到巴塞有氣冇碇抖，近四仗僅一敗，表現重上正軌。
對手立立亂PAOK有雞偷

西維爾中場杜查奧斯基、馬高馬連及拿傑迪錫曾於德國搵食，對德甲球隊弗賴堡熟到爛，實有好多堅料過畀艾帥。睇番弗賴堡仍未有起色，上仗聯賽慘吞多蒙特五蛋，未開齋兼排尾二，要開始為護級諗計，呢類中型班兵源緊絀，兩線作戰非常吃力，就算想喺歐霸威威亦有心無力，作客西維爾都係聽炒格，讓球主勝有2倍咪錯過。

至於歐霸L組荷蘭阿爾克馬爾主場迎戰希臘球隊PAOK，前者上場擊敗燕豪芬後突然辭退教練華碧克，令人摸不着頭腦，PAOK過去一個月踢咗六場未輸過，狀態唔曳，可乘阿軍立立亂偷到雞。最後巴甲邦迪比達作客明尼路，邦軍周三早上至踢完「快車」，仲要輸畀弱旅紐迪高，信心盡失，兩日後又要出戰，邊有咁快回得切氣喇，明尼路要贏兩粒依絲執。