新貴迪尼普恰傷鋒費倫

猪拉多纳

烏克蘭球隊迪尼普主場鬥意甲費倫天拿，費倫嚴重傷「鋒」，繼馬里奧高美斯長抖後，首席射手基奧斯比羅斯亦傷埋，今仗上陣成疑，遠赴東歐恐怕捱打居多。迪尼普五連勝勢如破竹，小讓平半上盤值博。

（有線61及201台周五凌晨3時05分直播）

費倫天拿開季後表現唔錯，無奈受傷兵打擊，除馬里奧高美斯缺陣兩個月外，基奧斯比羅斯上仗聯賽踢咗36分鐘就傷出。費倫今季13個聯賽入球有7球由呢兩人包辦，若然羅斯仔倦勤，對球隊影響甚大。

迪尼普已成烏克蘭新興勢力，今季聯賽成績更勝傳統勁旅基輔戴拿模及歐聯分子薩克達，球隊一直渴望喺歐洲賽闖出名堂，同基、薩二軍睇齊，今仗正係省靚招牌好機會。以迪尼普目前強勢，加上對手人腳不整，主隊勝算樂觀。