曼聯搞革新

猪拉多纳

莫耶斯光明球場尋找光明

曼聯經歷24年以來最差開局，目前深陷無間地獄，今周哀兵作客新特蘭，決心喺光明球場尋找光明。飽受批評嘅「紅魔」主帥莫耶斯率落難之師出征，似乎係時候拋棄成見認真求變，考慮各種解決攻力問題方案，喺排陣上搞革新，而最直接嘅做法就係將香川真司及查維亞靴南迪斯等有料進攻球員解凍，增強中場創造力和前線把握力，如果變陣成功又踢出水準，要贏「黑貓」非難事，熱捧客W！

（now 621周日凌晨零時30分直播）
小豌豆香川幫到手

「紅魔鬼」開季聯賽6戰僅得7分，現時位處用iPhone睇積分榜上半版見唔到嘅第12位，創出自89至90季度以來最曳開局，「反曼」球迷無不忘情慶祝，唔少「魔粉」矛頭則直指新帥莫耶斯，斥其冇料做費格遜接班人。查實老費繼任人個位真係唔易做，依家莫耶斯仲要時間搵出最佳陣容，而曼聯球迷普遍認為球隊現時創造力不足，極需要日本進攻中場香川真司串連中場支援鋒線，若然朗尼今場未能趕及傷愈復出，「紅魔鬼」一定更需要香川去做波，否則射手尹佩斯隨時喺前線孤軍作戰。

至於前線尖刀查維亞靴南迪斯一向民望高企，好多人都認為「小豌豆」質素在韋碧克之上，淪為球隊第4前鋒相當陰功。佢同香川周中歐聯都冇打，唔知係咪莫帥開始順應民意求變，故意畀佢哋留力踢呢場非勝不可嘅「還魂波」，如果二人合作有新火花，隨時幫紅魔搵到一套走向光明的陣容。
新特蘭輸級數

新特蘭上周聯賽喺看守領隊奇雲波爾領軍下主場對利物浦踢得唔曳，美國中鋒艾迪杜里喺前線停到波，進攻中場阿當莊臣左腳踢右邊好有威脅，計點數佢哋不遜「紅軍」，關鍵只係埋門一腳，利物浦兩個殺手史杜列治同蘇亞雷斯加埋入3球，「黑貓」只憑基亞卓尼利入1粒。今場勝負分野都係一樣，深信曼聯贏在級數，可以連續6次殺敗新特蘭。
球員Chit Chat

基亞卓尼利(新特蘭中場)：依家鬥曼聯係搶分好時機！佢哋啱啱惡戰完薩克達，今場發揮必受影響，若球隊今場能夠不敗，定可提升士氣同信心。

傑斯(曼聯中場)：季初踢得曳唔應該怪領隊，雖然開季唔順，但仲有時間撥亂反正，我哋係冠軍級球隊，要再現王者之風！

猪拉多纳