馬體會炸切爾達出氣

猪拉多纳

「野獸」變節受阻成肚火

今晚西甲早場馬體會主場迎戰切爾達，講到呢期「床單軍」嘅風頭躉，梗係「野獸」迪亞高哥斯達喇！呢位狀態弗爆嘅巴西猛男決心為西班牙効力，卻被「森巴兵團」阻頭阻勢，搞到變節唔成，狀態曳爆嘅切爾達依家送上門，整定冇運行，勢成「野獸」嘅晚餐，讓球主勝有買趁早。

（now 635周日晚6時直播）
巴西阻變身鬥牛士

其實西班牙國家隊向巴西兵招手屢見不鮮，昔日維拉利爾嘅巴西裔防中辛拿，就係「鬥牛國」捧走08年歐國盃嘅重要功臣。由於迪亞高哥斯達在西班牙搵食多年已入籍，之前又只為「森巴兵團」踢咗一場熱身賽，並非正式A級比賽，完全符合化身「鬥牛士」資格，但正當哥斯達與西班牙主帥迪保斯基「兩情相悅」之際，巴西立即向國際足協投訴，仲成功暫時禁止「野獸」變節，搞到哥斯達成肚火。

迪亞高哥斯達今季弗到漏油，唔單止上輪作客皇馬一箭定江山，結束馬體會14年來未贏過死敵嘅宿命，依家佢於射手榜拍住美斯做一哥，搶晒隊友韋拿風頭，難怪馬體會兩線作戰均高奏凱歌喇。相反切爾達教頭、巴塞名宿安歷基冇料扮四條，想學老友哥迪奧拿咁重用新人起革命，點知愈搞愈曳，之前三場未贏過之餘，最慘係連波都入唔到，一班小將踢到冇晒信心，仲要對住搵人出氣嘅迪亞高哥斯達，都係等炒格，斯維強捧讓球主勝，實行扒住飯等收錢。